Transmetuesi publik izraelit KAN (Israeli Public Broadcasting Corporation) i ka kërkuar falje grupit përfaqësues kroat në Eurovision, Lelek, pas reagimeve të shkaktuara nga një postim në rrjetet sociale që u interpretua si tallës ndaj performancës së tyre.
Sipas raportimeve, KAN kishte publikuar një video të performancës së grupit shoqëruar me një koment në hebraisht që përkthehej: “Kur e tepron me tatuazhet me këna në Eilat”, së bashku me mbishkrimin “Po e teprojnë vërtet”. Ky postim u perceptua nga grupi kroat si nënçmues ndaj simbolikës dhe mesazhit të performancës së tyre.
Grupi Lelek reagoi duke shprehur shqetësim për mënyrën se si u trajtua paraqitja e tyre, duke e konsideruar komentimin si mungesë respekti ndaj kulturës dhe mesazhit artistik të këngës së tyre.
Pas reagimeve publike, transmetuesi izraelit e fshiu postimin dhe deklaroi se nuk kishte qëllim të ofendonte delegacionin kroat apo publikun e Kroacisë. “Kërkojmë ndjesë dhe do t’ia përcjellim këtë ndjesë delegacionit kroat”, thuhej në reagimin e tyre zyrtar.
Grupi Lelek është kualifikuar në finalen e madhe të Eurovision Song Contest.
KAQPATA
