Parlamenti Kantonal i Zürichut ka votuar për ndalimin e mbajtjes së shamisë në shkollat publike, një vendim që ka hapur debat të ri mbi lirinë fetare dhe neutralitetin në institucionet arsimore.
Nisma, e mbështetur nga Partia Popullore e Zvicrës (SVP), parashikon ndalimin e shamisë si për mësueset, ashtu edhe për nxënëset në shkollat publike të kantonit.
Sipas SVP-së, shamia paraqet “një simbol të shtypjes dhe të islamit politik” dhe nuk duhet të ketë vend në institucionet publike arsimore.
Nismën e mbështetën edhe liberalët e FDP-së dhe disa parti më të vogla.
Në anën tjetër, socialdemokratët, të gjelbrit dhe partitë e qendrës votuan kundër, duke argumentuar se një ndalim i tillë mund të cenojë lirinë e besimit fetar.
Qeveria e kantonit të Zürichut kishte sinjalizuar mbështetjen për këtë masë edhe para votimit në parlament. Tashmë ajo ka deri në dy vjet kohë për të përgatitur propozimin konkret për zbatimin e ligjit.
Debati më i madh lidhet me nxënëset
Ndalimi i shamisë për mësueset tashmë zbatohet edhe në disa kantone të tjera zvicerane, përfshirë Bernën dhe Gjenevën. Javën e kaluar, një vendim të ngjashëm mori edhe parlamenti i kantonit Aargau.
Megjithatë, përfshirja e nxënëseve në ndalim pritet të jetë pjesa më e debatueshme nga pikëpamja juridike.
Në vitin 2015, Gjykata Supreme Federale e Zvicrës kishte vendosur, pas një rasti në St. Margrethen të Zvicrës lindore, se interesi publik, përfshirë neutralitetin shtetëror dhe barazinë gjinore, nuk ishte bazë e mjaftueshme ligjore për t’ua ndaluar nxënëseve mbajtjen e shamisë gjatë mësimit.
Për këtë arsye, mënyra se si do të zbatohet vendimi i ri dhe nëse ai do t’i rezistojë një shqyrtimi gjyqësor pritet të jetë një nga çështjet kryesore në muajt e ardhshëm.
Ndalim edhe për pajisjet elektronike
Parlamenti i Zürichut ka miratuar gjithashtu një masë tjetër për shkollat publike.
Sipas vendimit, përdorimi privat i celularëve, tabletëve dhe kompjuterëve personalë do të ndalohet në shkollat publike të kantonit.
Vendimet kanë rikthyer në qendër të debatit në Zvicër çështjet e disiplinës në shkolla, neutralitetit të institucioneve publike, lirisë fetare dhe mënyrës së përdorimit të teknologjisë nga nxënësit.
KAQPATA
