Platforma qytetare “Liria ka Emër” ka publikuar skenarin e Marshit për Liri, i cili mbahet sot, më 12 shtator, në Prishtinë, duke nisur nga ora 14:00.
Aktiviteti do të zhvillohet në sheshin “Skënderbeu”, ndërsa moderimi i programit do t’i besohet Berat Miftarit.
Marshi nis me një program artistik, ku Arbnora Zogiani do të interpretojë këngën “Pa duvak s’ka me u ba nuse”.
Pas hapjes artistike, në skenë do të ngjiten dy përfaqësuesit e platformës “Liria ka Emër”, Ismail Tasholli dhe Eliza Hoxha, për hapjen zyrtare të aktivitetit.
Në kuadër të programit është paraparë edhe fjala e Hysni Gucatit, ndërsa më pas do të flasë Lirjona Sylejmani, vajza e dëshmorit të kombit, Bajram Sylejmani.
Programi do të vijojë me interpretimin e këngës “Marshi i UÇK-së” nga këngëtari Arif Vladi.
Në skenë do të jenë edhe përfaqësues politikë. Fjalime janë paraparë nga Ardian Gjini, kryetar i Aleancës për Kosovën, dhe Bedri Hamza, kryetar i Partisë Demokratike të Kosovës.
Pjesë e programit do të jetë edhe Buna Mustafa, vajza e Sali Mustafës – Calit.
Marshi do të përmbyllet me interpretimin e këngëtares Shkurte Fejza, e cila do të këndojë himnin e shqiptarëve, “Mora Fjalë”.
Marshi organizohet në mbështetje të ish-drejtuesve të Ushtrisë Çlirimtare të Kosovës që po përballen me procesin gjyqësor në Hagë.
KAQPATA
