Ish-ambasadori amerikan në Kosovë, Jeff Hovenier, ka paralajmëruar se Kosova mund të përballet me një ulje të interesimit nga Shtetet e Bashkuara të Amerikës nëse nuk i përgjigjet pozitivisht ofertës së administratës së presidentit Donald Trump për bashkëpunim në sektorin energjetik.
Në një intervistë për emisionin “Rubikon”, Hovenier tha se administrata e Trumpit ka treguar një qasje transaksionale në raport me partnerët ndërkombëtarë, duke favorizuar bashkëpunimin me vendet që shfaqin gatishmëri për marrëveshje dhe projekte të përbashkëta.
Sipas tij, oferta për gazin e lëngshëm natyror (LNG) përfaqëson një mundësi strategjike për Kosovën, ndërsa refuzimi ose mungesa e reagimit mund të ndikojë negativisht në nivelin e angazhimit amerikan ndaj vendit.
“Administrata e Trumpit është dëshmuar si transaksionale. Nëse jeni të gatshëm të bëni marrëveshje, bëni; nëse jo, nuk jeni të interesuar. Nëse Kosova nuk i përgjigjet ofertës së administratës së Trumpit për LNG, atëherë administrata e Trumpit do të humbasë edhe më shumë interes për Kosovën”, deklaroi Hovenier.
Ai shtoi se forcimi i partneritetit energjetik dhe angazhimi në dialog me SHBA-në e konsolidon pozitën e Kosovës si një partnere e besueshme strategjike, ndërsa çdo veprim në drejtim të kundërt mund të zhvendosë interesin amerikan drejt vendeve të tjera.
Deklaratat e Hovenier vijnë në një periudhë kur çështjet e sigurisë energjetike dhe marrëdhëniet me aleatët strategjikë po konsiderohen ndër temat më të rëndësishme për të ardhmen e Kosovës.
KAQPATA
