Presidenti i Këshillit Evropian, Antonio Costa, gjatë vizitës së tij në Prishtinë ka përcjellë mesazhe të qarta për rrugën evropiane të Kosovës, duke theksuar se mbështetja e Bashkimit Evropian vjen me kushtin e përmbushjes së reformave institucionale dhe forcimit të sundimit të ligjit.
Gjatë qëndrimit në Kosovë, Costa është takuar me ushtruesen e detyrës së presidentes, Albulena Haxhiu, si dhe me kryeministrin në detyrë, Albin Kurti, ku është diskutuar agjenda evropiane, Plani i Rritjes për Ballkanin Perëndimor dhe stabiliteti rajonal.
Në një konferencë për media në Prishtinë, Costa deklaroi se progresi i Kosovës drejt Bashkimit Evropian varet kryesisht nga vetë institucionet vendore dhe aftësia e tyre për të zbatuar reformat e kërkuara.
Ai theksoi se partneriteti me BE-në nënkupton përgjegjësi të brendshme dhe institucione funksionale, duke shtuar se Bashkimi Evropian nuk mund të zëvendësojë detyrat e shtetit të Kosovës.
Costa vlerësoi gjithashtu harmonizimin e politikës së jashtme të Kosovës me atë të BE-së, si dhe përkushtimin ndaj vlerave demokratike dhe bashkëpunimit rajonal.
Një nga pikat kryesore të deklarimeve të tij ishte edhe dialogu Kosovë–Serbi, të cilin e cilësoi si proces vendimtar për perspektivën evropiane të të dy vendeve, duke kërkuar normalizim të plotë të marrëdhënieve.
Nga ana tjetër, përfaqësuesit institucionalë të Kosovës riafirmuan orientimin strategjik të vendit drejt integrimit evropian, duke theksuar progresin në reforma, ekonomi dhe sundim të ligjit.
Qeveria e Kosovës vlerësoi se vendi është i gatshëm për hapa të mëtejshëm drejt statusit të kandidatit në BE dhe hapjes së negociatave, duke u bazuar në reformat e realizuara dhe stabilitetin institucional.
Vizita e Costas në Prishtinë shënon një tjetër moment të rëndësishëm në raportet Kosovë–BE, në një periudhë kur pritet intensifikim i procesit të integrimit evropian.
KAQPATA
