Qeveria në detyrë e Kosovës ka miratuar buxhetin prej rreth 11 milionë eurosh për organizimin e zgjedhjeve të parakohshme parlamentare që do të mbahen më 7 qershor 2026.
Vendimi është marrë në një mbledhje elektronike të ekzekutivit dhe lidhet me kërkesën e Komisionit Qendror të Zgjedhjeve (KQZ), i cili ka parashikuar një kosto prej 10,887,186.45 euro për procesin zgjedhor.
Sipas njoftimit zyrtar, ky buxhet do të mbulojë të gjitha shpenzimet për organizimin e zgjedhjeve, të cilat vijnë pas dështimit për zgjedhjen e presidentit të ri dhe krizës politike që ka bllokuar funksionimin institucional të vendit.
Ky është cikli i tretë i zgjedhjeve parlamentare brenda 18 muajsh në Kosovë, pas atyre të shkurtit dhe dhjetorit 2025, duke reflektuar paqëndrueshmërinë politike dhe vështirësitë në formimin e institucioneve.
Sipas rregullave kushtetuese, zgjedhja e presidentit kërkon fillimisht dy të tretat e votave të deputetëve, ndërsa në raundin e tretë mjafton shumica e thjeshtë prej 61 votash. Mosmarrëveshjet mes partive kanë bërë që ky proces të mbetet i bllokuar.
Kryeministri në detyrë, Albin Kurti, ka paralajmëruar se vendi mund të përballet sërish me një krizë pas zgjedhjeve nëse nuk arrihet konsensus politik për formimin e institucioneve të reja.
KAQPATA
