Avokati i Popullit, Naim Qelaj, ka ngritur shqetësimin se vendimi i Zyrës së Rregullatorit për Energji (ZRRE) për të kaluar bizneset në tregun e lirë të energjisë është marrë në kushte politike të papërshtatshme dhe mund të dëmtojë drejtpërdrejt të drejtat e qytetarëve.
Qelaj theksoi se një vendim i tillë është i nxituar dhe merr formë diskriminuese në një kohë kur institucionet shtetërore janë të bllokuara dhe mungon debati parlamentar.
“Çdo vendim që prek interesin dhe të drejtat e qytetarëve, kur nuk ka debat publik e institucional, është shumë i vështirë për t’u marrë. Ky është një vendim që krijon pabarazi mes konsumatorëve,” tha ai për Ekonomia Online.
Ai kërkoi që Qeveria të ndërhyjë dhe të ofrojë zgjidhje alternative për të mbrojtur qytetarët dhe bizneset, duke kritikuar lënien e barrës mbi konsumatorët e tregut të lirë të energjisë.
“Ka qenë e nevojshme që Qeveria të ndërhyjë për të krijuar kushte më të favorshme, jo t’ia lërë barrën vetëm konsumatorëve,” shtoi Qelaj.
Ai gjithashtu paralajmëroi për rrezikun që sjell trajtimi i këtij vendimi përmes gjykatave, duke theksuar mundësinë e trajtimit të pabarabartë mes konsumatorëve.
“Zgjidhja gjyqësore e rasteve mund të çojë në situata diskriminuese – disa biznese mund të përfitojnë nga furnizimi universal, ndërsa të tjerat jo.”
Megjithëse deri tani Avokati i Popullit nuk ka pranuar ndonjë ankesë formale nga qytetarët, Qelaj tha se vendimi i ZRRE-së duhet rishikuar me kujdes.
“Ky vendim në këto rrethana është një goditje e rëndë për shumë biznese dhe ndikon në vendet e punës dhe të drejtat sociale të qytetarëve.”
KAQPATA
