Ish-nënkryetari i LDK-së, Agim Veliu, ka reaguar sërish lidhur me zhvillimet e fundit brenda partisë, duke vlerësuar se kërkesat për dorëheqjen e kryetarit Lumir Abdixhiku janë legjitime dhe të drejta.
Përmes një reagimi publik, Veliu ka theksuar se Abdixhiku duhet të marrë përgjegjësinë për rezultatet e LDK-së, ashtu siç ka marrë meritat për sukseset që, sipas tij, janë prezantuar gjatë drejtimit të partisë.
“Kërkesat për dorëheqjen e Lumir Abdixhikut janë plotësisht legjitime dhe të drejta. Ato burojnë nga fakti se ai mori përsipër meritat për çdo sukses të pretenduar, prandaj duhet të marrë përsipër edhe përgjegjësinë për dështimin”, ka shkruar Veliu.
Ai ka kritikuar drejtimin e deritanishëm të LDK-së, duke thënë se partia ka mbetur në vendin e tretë në skenën politike dhe nuk ka arritur të rikthehet si alternativë serioze për qeverisje, pavarësisht premtimeve dhe kontrollit të plotë të udhëheqjes mbi strukturat partiake.
Sipas Veliut, pas disa cikleve zgjedhore pa rezultatet e pritshme, mosreflektimi politik nga kryetari i partisë përbën pengesë për reformimin e brendshëm të LDK-së.
Ish-zyrtari i lartë i partisë ka kritikuar gjithashtu reagimin e Abdixhikut ndaj kërkesave për dorëheqje të ardhura nga disa degë të LDK-së, duke e cilësuar atë si të papërshtatshëm.
“Në vend të reflektimit ndaj kritikave, ai reagoi duke kërkuar dorëheqjen e kryetarëve të degëve që kanë fituar vazhdimisht zgjedhjet në komunat e tyre, ndërsa vetë refuzon të japë llogari për rezultatet në nivel qendror”, ka deklaruar Veliu.
Ai shtoi se ndëshkimi i zërave kritikë brenda partisë dëmton demokracinë e brendshme dhe pengon debatin politik që, sipas tij, është i domosdoshëm për një reformim të vërtetë të LDK-së.
Debatet dhe pakënaqësitë brenda Lidhjes Demokratike të Kosovës kanë marrë hov pas zhvillimeve të fundit politike, ndërsa kërkesat për ndryshime në strukturat drejtuese vazhdojnë të jenë pjesë e diskutimeve brenda partisë.
KAQPATA
