Sot shënohen 27 vjet nga nënshkrimi i Marrëveshjes Ushtarako-Teknike të Kumanovës, dokumenti që shënoi përfundimin e luftës në Kosovë dhe fillimin e tërheqjes së forcave serbe nga territori i vendit.
Marrëveshja u nënshkrua më 9 qershor 1999 ndërmjet NATO-s dhe ish-Jugosllavisë, duke hapur rrugën për ndaljen e konflikteve dhe vendosjen e paqes në Kosovë.
Tërheqja e forcave serbe nga Kosova
Me këtë marrëveshje, Serbia u detyrua të tërhiqte të gjitha forcat policore dhe ushtarake nga Kosova, duke i dhënë fund pranisë së saj ushtarake pas muajsh luftimesh intensive.
Dokumenti hyri në fuqi më 11 qershor 1999 dhe konsiderohet si momenti kyç që i parapriu vendosjes së forcave paqeruajtëse ndërkombëtare.
Nënshkruesit dhe roli i NATO-s
Marrëveshja u nënshkrua nga përfaqësues të NATO-s dhe ish-Shtabit të Armatës së Jugosllavisë, përfshirë gjeneralin Nebojsha Pavkoviq, i cili më vonë u përball me akuza për krime lufte.
Nga ana e NATO-s, në proces ishte i përfshirë edhe komandanti i parë i KFOR, Michael Jackson.
Fundi i luftës dhe hyrja e paqes
Marrëveshja e Kumanovës shënoi pikën e kthesës historike, duke i hapur rrugë vendosjes së misionit të NATO-s dhe rikthimit të stabilitetit në Kosovë.
Ajo mbetet një nga dokumentet më të rëndësishme të historisë moderne të vendit, që lidhet drejtpërdrejt me përfundimin e luftës dhe fillimin e një periudhe të re politike dhe institucionale.
KAQPATA
