Sindikata e Minatorëve të ndërmarrjes Trepça ka ngritur shqetësime serioze për gjendjen aktuale në minierë, duke kërkuar përmirësim të kushteve të punës, rritje të pagave dhe investime urgjente nga shteti.
Në reagimin e tyre publik, minatorët theksojnë se rikthimi dhe zhvillimi i Trepçës nuk mund të arrihet pa mbështetje financiare dhe pa investime strategjike, duke paralajmëruar se mungesa e tyre po e rëndon situatën në ndërmarrje.
Sindikata kritikon menaxhmentin dhe bordin drejtues, duke i akuzuar për keqmenaxhim afatgjatë dhe për mungesë gatishmërie për të gjetur zgjidhje për problemet e minatorëve. Sipas tyre, barra e dështimeve është duke u reflektuar mbi punëtorët.
Një tjetër shqetësim i ngritur lidhet me pagat, të cilat minatorët i konsiderojnë të pamjaftueshme për një punë të rëndë dhe të rrezikshme. Ata gjithashtu kundërshtojnë draft-rregulloren e re të pagave, duke kërkuar përfshirje direkte në vendimmarrje.
Sindikata ka paralajmëruar se pas finalizimit të dokumentit do të konsultohen me minatorët për të vendosur nëse do ta pranojnë apo jo rregulloren e re, duke lënë të hapur mundësinë e reagimeve të mëtejshme.
Në fokus mbetet kërkesa për kushte më të sigurta pune, paga dinjitoze dhe investime që do të siguronin funksionimin afatgjatë të Trepçës.
KAQPATA
