Qendra Amerikane për Kontrollin dhe Parandalimin e Sëmundjeve (CDC) ka paralajmëruar se shpërthimi i fundit i Ebola-s në Afrikën Qendrore mund të arrijë përmasa të ngjashme me epideminë më të rëndë në histori, atë të viteve 2014–2016 në Afrikën Perëndimore, ku humbën jetën mbi 11 mijë persona.
Sipas një analize të re të bazuar në modele kompjuterike, CDC parashikon skenarë ku numri i rasteve mund të variojë nga 10 mijë deri mbi 20 mijë infektime, në varësi të shpejtësisë së izolimit të personave të infektuar dhe kontrollit të përhapjes së virusit.
Ekspertët theksojnë se situata mund të përkeqësohet ndjeshëm nëse masat e shëndetit publik nuk zbatohen me rigorozitet, duke paralajmëruar se shpërthimi aktual po ndjek një trajektore të rrezikshme.
Deri më tani, autoritetet shëndetësore në Afrikë kanë raportuar rreth 400 raste të konfirmuara dhe të paktën 63 viktima, ndërsa dyshohet se numri real mund të jetë më i lartë për shkak të rasteve të padiagnostikuara.
Organizata Botërore e Shëndetësisë e ka shpallur më herët shpërthimin si emergjencë globale shëndetësore, ndërsa situata është komplikuar nga konfliktet e armatosura në rajon, të cilat kanë vështirësuar ndjeshëm ndërhyrjen e ekipeve mjekësore.
Sipas CDC-së, shkalla e izolimit të rasteve aktualisht mbetet e ulët, çka rrit rrezikun e përhapjes së mëtejshme të virusit, ndërsa ekspertët theksojnë se ndërhyrja e shpejtë është vendimtare për të shmangur një katastrofë shëndetësore në shkallë të gjerë.
KAQPATA
