KAQPATA po ndjek nga afër zhvillimet në Lipjan lidhur me vdekjen e 27-vjeçarit Agon Zejnullahu, ngjarje për të cilën tashmë kanë nisur hetimet.
Policia e Kosovës ka konfirmuar se viktima dyshohet të ketë qenë nën ndikimin e alkoolit dhe se po sulmonte automjete dhe kalimtarë në rrugën “Haradin Bajrami” në Lipjan. Pas këtyre veprimeve, ai u arrestua nga policia dhe pak më vonë ndërroi jetë në vendngjarje.
Gazeta Demos ka publikuar pamje ekskluzive nga momenti i arrestimit, rreth orës 00:15 të natës së kaluar.
Pas publikimit të pamjeve, kanë nisur spekulime dhe reagime nga qytetarë të ndryshëm, të cilët dyshojnë se vdekja mund të ketë ardhur si pasojë e një arrestimi joprofesional nga katër policët e përfshirë.
Ndërkohë, sipas burimeve të gazetës, Inspektorati Policor i Kosovës ka nisur hetimet për rastin dhe ka angazhuar disa hetues për grumbullimin e provave të nevojshme.
Hetimet për të sqaruar plotësisht rrethanat e vdekjes janë në vazhdim.
KAQPATA
