Ministria e Shëndetësisë, në bashkëpunim me Institutin Kombëtar të Shëndetësisë Publike të Kosovës (IKSHPK), ka nxjerrë një listë rekomandimesh për institucionet publike dhe private në vend, për mbrojtjen e punëtorëve gjatë valëve të të nxehtit që kanë përfshirë vendin.
Sipas këtyre udhëzimeve, institucionet duhet të përshtatin oraret e punës, të aplikojnë orar fleksibil, dhe të lejojnë punonjësit të fillojnë punën më herët në mëngjes apo të punojnë nga shtëpia, kur është e mundur.
Masa të veçanta janë rekomanduar për këto kategori:
- Gratë shtatzëna: të lirohen nga puna gjatë orëve të pikut të temperaturave ose të punojnë nga shtëpia.
- Personat me sëmundje kronike dhe gjendje të rënduar shëndetësore: të punojnë nga shtëpia.
- Pikat e freskimit: në vendpunishtet e hapura të vendosen çadra të lëvizshme apo zona me hije, dhe të sigurohet ujë i ftohtë për punëtorët.
- Ajrosja e ambienteve të brendshme: të jetë e mjaftueshme për të garantuar kushte minimale gjatë punës.
- Bujqësia: punët në bujqësi të planifikohen në orët e hershme të mëngjesit apo në mbrëmje për të shmangur rrezikun nga ekspozimi në të nxehtë.
IKSHPK rekomandon gjithashtu informimin e qytetarëve përmes fushatave vetëdijësuese mbi mbrojtjen nga nxehtësia, si dhe bën thirrje që edhe sektori privat të zbatojë këto masa për të mbrojtur shëndetin e punëtorëve.
Ky reagim vjen në kohën kur temperaturat në Kosovë dhe rajon janë rritur ndjeshëm, duke rrezikuar seriozisht shëndetin e kategorive më të ndjeshme të popullatës dhe punëtorëve në terren.
KAQPATA
