Në zgjedhjet e parakohshme për Kuvendin e Kosovës që mbahen më 7 qershor 2026, listës së votuesve i janë shtuar 22,685 qytetarë që do të votojnë për herë të parë, sipas të dhënave të Komisionit Qendror të Zgjedhjeve (KQZ).
Sipas KQZ-së, numri i përgjithshëm i qytetarëve me të drejtë vote në këtë proces zgjedhor arrin në 2,092,174 votues, duke shënuar një rritje prej 15,884 votuesish krahasuar me zgjedhjet e mbajtura më 28 dhjetor 2025.
Struktura e votuesve
Nga numri total, 1,959,962 qytetarë do të votojnë brenda territorit të Kosovës, ndërsa 132,212 janë regjistruar nga diaspora.
Prej votuesve jashtë vendit:
- 100,970 do të dërgojnë votën përmes postës jashtë Kosovës
- 3,518 përmes postës në Kosovë
- 27,724 do të votojnë fizikisht në përfaqësi diplomatike
Votuesit për herë të parë
Sipas KQZ-së, 22,685 qytetarë do të ushtrojnë për herë të parë të drejtën e votës në këto zgjedhje.
Prej tyre:
- 16,934 janë të rinj që kanë mbushur 18 vjeç pas zgjedhjeve të fundit
- 5,751 janë qytetarë të regjistruar rishtazi në Regjistrin Qendror Civil ose që kanë rikthyer shtetësinë
Nga të rinjtë që votojnë për herë të parë, 51.68% janë meshkuj, ndërsa 48.31% femra.
Ndryshimet në listën votuese
KQZ bën të ditur se nga lista janë larguar gjithsej 6,801 votues, përfshirë:
- 6,165 persona të evidentuar si të ndjerë
- 419 persona që kanë humbur shtetësinë e Kosovës
- 217 votues të larguar pas të dhënave të KGjK-së
Organizimi i procesit zgjedhor
Procesi zgjedhor brenda vendit do të zhvillohet në 949 Qendra Votimi, me gjithsej 2,550 vendvotime. Nga këto, 911 qendra janë për votim të rregullt, ndërsa 38 qendra janë të dedikuara për votim me kusht.
Ndërkohë, votimi në diasporë është zhvilluar më 6 qershor në 30 përfaqësi diplomatike, përfshirë ambasada dhe konsullata.
Zgjedhjet e 7 qershorit pritet të jenë ndër proceset më të ndjekura në vend, duke reflektuar edhe përfshirjen e shtuar të votuesve të rinj.
KAQPATA
