Zymer Kodra, ish-ushtar i Ushtrisë Çlirimtare të Kosovës dhe më pas pjesëtar i Policisë së Kosovës, ka promovuar librin e tij me titull “Përtej Plumbave”, një vepër që ndërthur kujtimet personale, dëshmitë e luftës dhe sfidat e jetës në radhët e sigurisë.
Libri përfaqëson një përmbledhje të rrëfimeve autentike të komandantëve, ushtarëve dhe bashkëluftëtarëve që përshkruajnë realitetin e ashpër të luftës për liri – përtej armëve dhe plumbave, aty ku qëndron qëndresa njerëzore, sakrifica dhe ndjenja e thellë e atdhedashurisë.
Ceremonia e promovimit u mbajt në ambientet e Kuvendit Komunal të Lipjanit, ku morën pjesë figura të njohura nga institucionet e sigurisë, përfaqësues të shoqërisë civile, miq, familjarë, dhe dashamirë të librit dhe historisë.
“Ky libër nuk është vetëm një rrëfim personal,” theksoi autori gjatë fjalimit të tij, “por një dëshmi e përjetuar e një brezi që u përball me dhimbjen, frikën dhe shpresën – gjithmonë në shërbim të lirisë dhe dinjitetit njerëzor.”
“Përtej Plumbave” vjen si një rrëfim i ndjerë dhe tronditës, ku përshkruhen jo vetëm betejat fizike në frontin e luftës se Ushtrisë Çlirimtare të Kosovës , por edhe plagët shpirtërore, vuajtjet dhe momentet e reflektimit.
Në libër, Zymer Kodra ndan ngjarje të vërteta, duke i dhënë lexuesit një pasqyrë të sinqertë e të rrallë mbi dimensionin human të luftëtarit dhe përtej uniformës.
Promovimi përfundoi me nënshkrimin e kopjeve për të pranishmit dhe me një apel për ruajtjen e kujtesës kolektive, në një kohë kur rrëfimet autentike janë më të nevojshme se kurrë për të mos harruar rrugën e lirisë.
KAQPATA
