David Pearce, një nga emrat më të njohur të produksioneve në Hollywood, është dënuar me 146 vjet burg pas një procesi gjyqësor që ka tronditur opinionin publik amerikan.
Pearce u shpall fajtor për vdekjen e dy grave të reja në vitin 2021 – modeles Christy Giles dhe shoqes së saj, Hilda Marcela Cabrales-Arzola – pas një mbidoze fatale me fentanil dhe GHB, një substancë që shpesh përdoret në rastet e dhunës seksuale. Hetimet zbuluan se Pearce dhe bashkëpunëtori i tij, Brant Osborn, kishin ftuar viktimat në apartamentin e tij në Los Angeles, ku iu dhanë substanca të rrezikshme që çuan në vdekjen e tyre.
Përveç këtij rasti, Pearce u shpall fajtor edhe për përdhunimin e shtatë grave të tjera gjatë një periudhe prej 14 vjetësh (2007–2021), duke përfshirë përdhunime me përdorim force dhe ndaj viktimave në gjendje të pavetëdijshme.
Gjatë gjithë procesit gjyqësor, Pearce mohoi akuzat, duke pretenduar se marrëdhëniet ishin konsensuale, por gjykata e shpalli fajtor në të gjitha pikat kryesore të akuzës.
Prokuroria e Los Angelesit theksoi se ky dënim i ashpër “dërgon një mesazh të qartë për çdo person që mendon se mund të abuzojë, shfrytëzojë ose dëmtojë të tjerët pa pasoja.”
Ky rast ka rikthyer vëmendjen mbi abuzimet seksuale dhe kulturën e pushtetit në Hollywood, duke theksuar rëndësinë e lëvizjes #MeToo. Dënimi me 146 vjet burg konsiderohet një nga më të rëndët në historinë e industrisë së filmit amerikan.
KAQPATA
