Një gjykatë penale në Paris ka dënuar ish-presidentin francez Nicolas Sarkozy me pesë vjet burg dhe një gjobë prej 100 mijë eurosh, pasi e shpalli fajtor për përfshirje në një “organizatë kriminale” të lidhur me financimin e fushatës së tij zgjedhore nga Libia në vitin 2007.
Ky është dënimi i parë me burg të gjatë për Sarkozy-n, i cili më herët ishte dënuar me masa më të lehta. Gjykata vendosi që dënimi nuk mund të pezullohet, ndërsa Sarkozy, 70 vjeç, pritet të mësojë brenda një muaji se kur do të nisë ta vuajë atë.
Sarkozy u lirua nga akuzat për korrupsion dhe financim të paligjshëm, pasi gjykata nuk gjeti prova që fondet libiane kishin përfunduar drejtpërdrejt në arkën e fushatës. Megjithatë, ai u shpall fajtor për kërkesën ndaj bashkëpunëtorëve të tij që të siguronin mbështetje financiare nga regjimi i Muammar Gaddafit.
Menjëherë pas vendimit, Sarkozy e quajti vendimin “skandal” dhe njoftoi se do ta apelonte, duke deklaruar se “do të mbrojë pafajësinë e tij deri në frymën e fundit”.
Përveç tij, edhe ish-Ministri i Brendshëm Claude Guéant u dënua me gjashtë vjet burg për ryshfet, ndërsa ish-ministri Brice Hortefeux me dy vjet, që mund t’i vuajë me byzylyk elektronik.
Procesi, që zgjati më shumë se një dekadë hetimesh, nxori në pah lidhjet e dyshuara mes elitës franceze dhe regjimit libian, duke lënë gjurmë të forta në karrierën e një prej figurave më të rëndësishme të së djathtës franceze.
KAQPATA
