Aktorja britanike Hannah Waddingham, e njohur për rolin e saj si Rebecca Welton në serialin e suksesshëm Ted Lasso, po përjeton një nga momentet më të ndritshme të jetës së saj – në të pesëdhjetat. Me një karrierë në kulmin e saj dhe një qasje të çiltër ndaj jetës, Waddingham po sfidon normat shoqërore mbi plakjen dhe rolet e grave në ekran.
Në një intervistë për WebMD, ajo flet hapur për jetën si nënë beqare, si profesioniste në një industri kërkuese dhe si grua që e përqafon çdo rrudhë me krenari.
“Unë e shoh plakjen si një fitore të plotë,” thotë Waddingham. “Jam më e sigurt në veten time, në rolin tim si nënë, dhe në atë që dua të jem për të tjerët.”
Në vitin 2025, aktorja është përfshirë në projekte të shumta, përfshirë Mission: Impossible – The Final Reckoning, The Woman in Cabin 10 në Netflix, si dhe në projekte të animuara si Smurfs dhe Lilo and Stitch – për t’ia bërë qejfin vajzës së saj.
Në qershor, ajo dhe vajza e saj festuan bashkë dy momente të veçanta: 10-vjetorin e vogëlushes dhe ditëlindjen e 50-të të aktores. “Një festë masive, e çrregullt dhe fantastike”, e përshkruan Waddingham këtë ngjarje.
Ajo mban një qëndrim të qartë ndaj nocionit “anti-plakje”, duke thënë:
“Termi ‘anti-aging’ më bezdis. Ne të gjithë po plakemi çdo minutë të ditës – dhe kjo është një dhuratë.”
Sa i përket bukurisë dhe pamjes në industrinë e filmit, Waddingham thekson se nuk dëshiron të jetë e retushuar deri në pakuptimësi. Madje, kur kompania Mattel i propozoi të krijonte një kukull Barbie me portretin e saj për Ditën Ndërkombëtare të Gruas, ajo kërkoi që kukulla të kishte “muskuj të vërtetë dhe linja reale trupore”.
Një tjetër moment frymëzues vjen nga miqësia e saj me aktoren Juno Temple, të cilën e konsideron një motër për jetë. Për Hannah, solidariteti mes grave të moshave të ndryshme është forca më e madhe – jo një burim xhelozie.
Ajo ndan gjithashtu tre zakone të rëndësishme për vetëkujdes:
- Koha për veten: Si punëtore e palodhshme, ajo rezervon kohë për pushim të vetëdijshëm.
- Gjumi i rregullt: Në një jetë plot udhëtime dhe xhirime, gjumi është thelbësor.
- Prioriteti i gëzimit: Vajza, ushqimi dhe muzika janë qendrat e jetës së saj.
Waddingham përfaqëson një brez grash që nuk ka frikë të udhëheqë, të flasë hapur dhe të jetojë jetën me të gjitha ngjyrat e saj.
“Asgjë s’është perfekte – çdo gjë është mbi krahë dhe lutje. Por nuk do ta doja ndryshe,” përfundon ajo me buzëqeshje.
KAQPATA
