Në një lëvizje historike drejt mjekësisë të personalizuar dhe parandalimit të sëmundjeve, NHS ka njoftuar se çdo foshnjë në Mbretërinë e Bashkuar do të përfitojë nga testimi i plotë i genomit të tyre që në ditët e para të jetës. Ky është një element kyç i planit 10-vjeçar të shëndetësisë, i cili synon të kalojë nga trajtimi i sëmundjeve drejt parandalimit të tyre.
Sekretari i Shëndetësisë, Wes Streeting, bëri me dije se me ndihmën e teknologjive moderne, përfshirë sekuencimin e plotë të ADN-së (whole-genome sequencing), NHS do të jetë në gjendje të identifikojë qindra sëmundje potenciale që mund të zhvillohen më vonë në jetë dhe të ndërhyjë herët për t’i parandaluar ato.
Aktualisht, foshnjat në MB kryesisht testohen me një analizë gjaku në moshën rreth pesë ditë, që kontrollon për disa sëmundje të rralla. Me teknologjinë e re, mostra e gjakut do të merret nga kordonin umbilikal menjëherë pas lindjes, duke mundësuar një analizë më të thelluar dhe gjithëpërfshirëse.
Qeveria ka premtuar investime prej 650 milionë paundësh në kërkimin gjenomik, si pjesë e planit për transformimin e NHS drejt një sistemi që parashikon dhe parandalon sëmundjet, në vend të një sistemi që trajton vetëm simptomat dhe sëmundjet e tashme.
Përveç testimit të ADN-së, plani përfshin përdorimin e inteligjencës artificiale për të parashikuar sëmundjet dhe për të ofruar trajtim ose medikamente herët, si dhe zhvendosjen e kujdesit mjekësor nga spitalet drejt komuniteteve dhe kalimin nga shërbimet analoge në ato digjitale.
Ky plan vjen në kuadër të një rritjeje të financimit të NHS me 29 miliardë paundë në vit për tre vitet e ardhshme, me qëllim uljen e listave të pritjes dhe përmirësimin e shërbimeve shëndetësore në Mbretërinë e Bashkuar.
KAQPATA
