Një anije hënore private nga Japonia, me emrin Resilience, ka humbur kontaktin me Tokën në momentet e fundit të uljes në sipërfaqen e Hënës, duke lënë të paqartë fatin e saj dhe të misionit që mbante mbi vete një rover miniaturë dhe një simbolikë artistike.
Kompania ispace, me bazë në Tokio, bëri të ditur se pajisja kishte hyrë me sukses në orbitën hënore dhe po zbriste sipas planit. Megjithatë, pas një zbritjeje që zgjati më shumë se një orë, lidhja me anijen u ndërpre papritur, ndërsa transmetimi direkt i kompanisë u ndërpre po ashtu pa dhënë ndonjë rezultat të qartë.
Ky ishte përpjekja e dytë e ispace për të zbritur në Hënë, pas misionit të parë të dështuar dy vite më parë. Resilience mbante me vete Tenacious, një rover i lehtë evropian me rrota dhe kamera me rezolucion të lartë, i ndërtuar për të mbledhur të dhëna shkencore dhe për të gërmuar pluhur hënor për NASA-n. Bashkë me të ndodhej edhe një shtëpizë e vogël prej druri, e dizajnuar nga një artist suedez, që do të vendosej simbolikisht në Hënë.
Zona e synuar për ulje ishte Mare Frigoris, një fushë e gjerë dhe e sheshtë në pjesën veriore të Hënës, e zgjedhur për të shmangur rreziqet e terreneve të thepisura.
Ky mision ishte pjesë e përpjekjeve të reja globale për të përfshirë sektorin privat në eksplorimin hënor, një garë që deri vonë ishte domen i shteteve. Deri më sot, vetëm SHBA, Rusia, Kina, India dhe Japonia kanë realizuar ulje të suksesshme robotike në Hënë.
Pavarësisht dështimit të mundshëm, drejtuesit e ispace e kanë konsideruar këtë si një hap të rëndësishëm përpara, duke paralajmëruar misione më të mëdha për të ardhmen – përfshirë një anije të re deri në vitin 2027 në bashkëpunim me NASA-n.
Kaqpata.
