Në një lidhje direkte për Sport News, Altin Rraklli, legjenda e sulmit kuqezi, ka dhënë një mesazh të ndjerë dhe një këshillë të fortë për trajnerin Sylvinho, në prag të përballjes së shumëpritur mes Shqipërisë dhe Serbisë, që zhvillohet sonte në “Air Albania” nga ora 20:45.
“Ky nuk është thjesht një takim futbolli – është një përballje që e ndiejnë zemrat shqiptare në çdo cep të botës. Më pyeti një mik pse nuk do të vij në stadium, dhe unë i thashë: këtë herë duhet të jetë plot me tifozët tanë. Kjo është për ta,” – u shpreh Rraklli, duke prekur emocionalisht publikun.
Ai kujtoi edhe incidentin e famshëm në Beograd, duke theksuar se futbolli duhet të bashkojë dhe jo të nxisë urrejtje:
“Sfida e prishur nga droni në Beograd nuk duhet të na karakterizojë. Çfarë bëri publiku serb atë ditë nuk duhet të ndodhë më kurrë. Jemi fqinj, jemi kundërshtarë, por futbolli është më shumë se kaq.”
Në aspektin sportiv, Rraklli dha edhe një formulë konkrete për përzgjedhësin Sylvinho, duke sugjeruar një rreshtim me tre sulmues, dhe një besim të fortë në forcat e reja:
“Unë do të luaja me Brojën dhe Bajramin në krahë, dhe Mirlind Dakun në qendër. Janë të rinj, të fortë, dhe mund të çajnë mbrojtjen serbe. Nëse Sylvinho e do Asanin, le ta fusë, por unë besoj në këtë treshe.”
Kjo ndeshje duhet fituar me çdo kusht. Fitorja na jep mundësi reale për t’u kualifikuar. Barazimi nuk është dështim, por nuk mjafton për objektivat që kemi,” përfundoi Rraklli, duke rritur optimizmin në kampin kuqezi.
“Besoj te sulmi ynë dhe jam i sigurt se do të fitojmë, edhe me një 1-0 të pastër”, u shpreh ai me plot pasion.
KAQPATA
