Barcelona ka nisur përgatitjet për një verë të ngarkuar në afatin kalimtar, ku drejtuesit e klubit synojnë të përforcojnë skuadrën në disa pozicione kyçe për sezonin e ardhshëm.
Sipas planit të ri sportiv të drejtuar nga Hansi Flick, prioritetet kryesore të katalanasve përfshijnë tre emra të rëndësishëm: Andreas Christensen, Joao Cancelo dhe Marcus Rashford.
Situata më e ndërlikuar mbetet ajo e Andreas Christensen. Mbrojtësi danez ndodhet në fund të kontratës dhe nuk ka arritur të rikthehet në formën optimale pas problemeve fizike. Barcelona i ka ofruar një rinovim afatshkurtër me kushte financiare të reduktuara, në përputhje me kufizimet ekonomike të klubit.
Klubi nuk po ofron një kontratë të majme, por një mundësi për vazhdim në projekt, ku lojtari do të duhet të dëshmojë veten përmes paraqitjeve në fushë. Në moshën 30-vjeçare, Christensen pritet të vendosë nëse do të qëndrojë në La Liga apo do të shqyrtojë oferta nga Anglia dhe kampionatet e tjera evropiane.
Ndërkohë, Joao Cancelo po fiton gjithnjë e më shumë besimin e stafit teknik. Portugezi ka impresionuar sidomos pas përshtatjes në krahun e majtë të mbrojtjes, ku Flick e sheh si një element të rëndësishëm për skemat e tij. Barcelona vlerëson aftësitë e tij sulmuese dhe fleksibilitetin në të dy krahët e mbrojtjes.
Cancelo dëshiron të vazhdojë në “Camp Nou”, gjë që mund të lehtësojë negociatat me Al Hilal, megjithëse klubi saudit kërkon rreth 10 milionë euro për transferimin e tij.
Në qendër të vëmendjes mbetet edhe Marcus Rashford. Sulmuesi anglez ka lënë përshtypje pozitive gjatë periudhës së huazimit, me gola dhe asistime vendimtare, por forma e tij jo e qëndrueshme ka hapur diskutime brenda klubit.
Manchester United kërkon rreth 30 milionë euro për kartonin e tij, ndërsa paga e lartë e lojtarit përbën pengesën kryesore për Barcelonën. Rashford është i hapur për vazhdimin e qëndrimit në Spanjë, por vendimi final mbetet i varur nga prioritetet financiare të klubit katalanas.
Trajneri Flick mbështet qëndrimin e tij, por drejtori sportiv Deco duhet të balancojë buxhetin përpara se të merret një vendim përfundimtar. Barcelona synon fillimisht afrimin e një sulmuesi qendre, çka mund të ndikojë drejtpërdrejt në të ardhmen e Rashford.
Në këtë fazë, asnjë nga lojtarët nuk konsiderohet i larguar, por as nuk e ka të sigurt qëndrimin në skuadër për sezonin e ardhshëm.
KAQPATA
