Këngëtari i njohur shqiptar nga Maqedonia e Veriut, Shpat Kasapi, është shuar në moshën 40 vjeçare pas një arresti kardiak në Itali. Artisti ndodhej atje së bashku me ish-bashkëshorten dhe djalin e tyre për një kontroll mjekësor të fëmijës.
Familjarët konfirmuan se ai kishte pasur shqetësime të lehta të zemrës, por jo probleme të rënda që mund të paralajmëronin një fund të tillë tragjik. Ndihma e parë i është dhënë në banesë, por ai nuk ka arritur të mbijetojë. Trupi i tij ndodhet ende në Itali dhe pritet të nisin procedurat e kthimit.
Shpat Kasapi u bë i njohur në fillim të viteve 2000, duke u shndërruar shpejt në një prej emrave më të dashur të skenës shqiptare. Me këngë si “A më do?”, “Aroma e saj”, “Dashni pa limit” dhe “Valle Kosovare”, ai ndikoi në rritjen muzikore të një brezi të tërë.
Në vitin 2021 ai u martua me Selvije Jaon, me të cilën ka një djalë, Roelin. Edhe pse çifti u divorcua, marrëdhëniet mes tyre kanë mbetur të mira për hir të fëmijës. Në një dëshmi prekëse, ish-bashkëshortja tregoi se Kasapi ndërroi jetë në krahët e saj, në një periudhë kur po përgatitnin dokumentet për trajtimin e djalit në Itali.
Lajmi për vdekjen e tij ka sjellë reagime të shumta nga artistë, kolegë dhe figura publike, të cilët e kanë përshkruar Shpat Kasapin si një njeri fisnik, pozitiv dhe të dashur me të gjithë. Ai do të kujtohet për muzikën e tij dhe për karakterin e qetë që e ka shoqëruar gjithmonë.
KAQPATA
