Dy avionë luftarakë F-35 të NATO-s u ngritën në ajër për të identifikuar dhe ndjekur një aeroplan spiun rus pranë hapësirës ajrore të Norvegjisë. Avioni rus IL-20 COOT-A u lokalizua duke fluturuar mbi hapësirën ajrore ndërkombëtare në rajonin verior të Finnmarkut.
Komanda Ajrore e NATO-s bëri të ditur se ndërhyrja u realizua si pjesë e Alarmit të Reagimit të Shpejtë të aleancës. Përmes një postimi në rrjetin social ‘X’, ata konfirmuan operacionin dhe publikuan një imazh të avionit rus.
Ky incident ndodh në një kohë kur provokimet ajrore ruse pranë hapësirës ajrore të NATO-s në Evropë janë shtuar. Presidenti i Letonisë, Edgars Rinkevics, ka kërkuar një qasje më të ashpër të aleancës, duke sugjeruar kalimin nga “policimi ajror” në një “mbrojtje ajrore” të plotë.
Ndërkohë, komandantët e NATO-s kanë paralajmëruar se procedurat për shtetet anëtare që përballen me kërcënime të tilla mund të lehtësohen, duke përfshirë edhe mundësinë për rrëzimin e avionëve që shkelin sigurinë ajrore.
KAQPATA
