Gazetaria është themeli i çdo shoqërie demokratike. Ajo nuk duhet të ketë asnjë ngjyrë politike, asnjë interes personal mbi interesin publik. Por në Kosovë, realiteti shpesh tregon të kundërtën. Një pjesë e medias dhe disa gazetarë nuk janë më mbrojtës të së vërtetës, por zëdhënës të pushtetit. Servilizmi ndaj politikës dhe interesave të pushtetarëve ka kapluar disa media, dhe kjo është një plagë që e dobëson demokracinë dhe besimin e qytetarëve.
Ky servilizëm nuk është një gabim i vogël profesional, është një tradhti ndaj publikut dhe një turp për vetë profesionin.
Servilizmi shfaqet në shumë forma: nga lajmet njëanshme, që glorifikojnë politikanët, tek heshtja për skandale të mëdha; nga promovimi i interesave private të pushtetarëve, tek sulmet ndaj atyre që guxojnë të kritikojnë. Kur gazetari bëhet i blerë, ai nuk është më profesionist, por një vegël politike, një “zëdhënës i pushtetit” që fshin të vërtetën për të mbrojtur përfitimet e veta.
Ky problem nuk lidhet vetëm me individët, por edhe me strukturën e medias në Kosovë. Varësia financiare e shumë mediave nga partitë dhe institucionet publike krijon një klimë ku servilizmi bëhet normë. Integriteti dhe pavarësia janë luks që shumë gazetarë nuk mund t’i përballojnë, dhe qytetarët përfundojnë duke marrë informacion të manipuluar ose të censuruar.
Profesioni i gazetarit kërkon guxim. Guxim për të raportuar të vërtetën edhe kur kjo nuk i pëlqen pushtetarëve. Guxim për të sfiduar interesa të fuqishme. Kur ky guxim mungon, kur servilizmi zë vendin e integritetit, qytetarët humbasin mbrojtësin e tyre më të rëndësishëm: zërin që duhet t’i tregojë të vërtetat e vështira dhe t’i mbajë pushtetarët përgjegjës.
Kosova ka nevojë për një gazetari të ndershme, të guximshme dhe të pavarur. Një gazetari që nuk shitet, që nuk falet dhe që vendos profesionin mbi interesat e pushtetit. Vetëm kështu media mund të mbetet mburojë e qytetarëve dhe garante e demokracisë. Nëse jo, ajo do të vazhdojë të jetë një pasqyrë e deformuar e realitetit, një instrument servilizmi që i bën dëm shoqërisë.
KAQPATA
