Qendrat për Kontrollin dhe Parandalimin e Sëmundjeve (CDC) në SHBA kanë publikuar të dhëna të reja që tregojnë një rënie të rasteve të sëmundjeve seksualisht të transmetueshme tek të rriturit, por një rritje shqetësuese të sifilisit tek të porsalindurit.
Në vitin 2024, rastet e klamidias, gonorresë dhe sifilisit ranë me 9% krahasuar me vitin e kaluar, duke shënuar vitin e tretë radhazi me ulje. Megjithatë, rastet e sifilisit kongjenital – infeksioni i transmetuar nga nëna tek foshnja – u rritën për të 12-in vit me radhë, duke arritur gati 4,000 raste të raportuara.
Sipas CDC, krahasuar me një dekadë më parë, rastet totale të infeksioneve seksualisht të transmetueshme janë 13% më të larta, ndërsa sifilisi kongjenital është rritur me afro 700%. Ekspertët theksojnë se një ndër arsyet kryesore mbetet mungesa e depistimit të plotë: vetëm 80% e grave shtatzëna kryejnë testimin për sifilis.
Kjo sëmundje mund të shkaktojë pasoja fatale si abort, lindje të vdekur, vdekje të foshnjës apo probleme të përjetshme shëndetësore si humbje të shikimit e dëgjimit, aftësi të kufizuara intelektuale dhe më shumë.
Ekspertët e shëndetit publik e quajnë këtë një problem të madh që kërkon ndërhyrje urgjente për të mbrojtur nënat dhe fëmijët.
KAQPATA
