Bashkimi Evropian ka njoftuar se përkohësisht do të pezullojë takimet me kryeministrin në detyrë Albin Kurti dhe kabinetin e tij brenda ndërtesës së Qeverisë së Kosovës, deri në formimin e një qeverie me mandat të plotë. Vendimi vjen pas aktgjykimit të Gjykatës Supreme të Kosovës më 25 qershor, i cili shpalli të pavlefshëm një udhëzim administrativ të Ministrisë së Financave, duke u bazuar në nenin kushtetues që ndalon ushtrimin e njëkohshëm të funksioneve ministrore dhe parlamentare.
Në letrën drejtuar Kurtit më 8 gusht 2025, shefi i Zyrës së BE-së në Kosovë, Aivo Orav, thekson se vendimi synon shmangien e pasigurive dhe keqinterpretimeve, duke u referuar rastit të vizitës së fundit të Përfaqësuesit Special të BE-së për Dialogun Beograd–Prishtinë. Vizitorët e nivelit të lartë nga BE-ja do të shmangin takimet brenda ndërtesës së Qeverisë derisa të formohet një qeveri me mandat të plotë.
Ky vendim ka shkaktuar reagime të forta në skenën politike kosovare, duke u perceptuar jo thjesht si një masë formale, por si një presion i drejtpërdrejtë ndaj Qeverisë së VV-së, e udhëhequr nga Albin Kurti. Një pjesë e vëzhguesve politikë sugjerojnë se kjo lidhet me përpjekjet e VV-së për të kufizuar ndikimin e Listës Serbe në qeverisje – një grup politik që ka lidhje me Beogradin dhe për mungesë besimi ndaj institucioneve të Kosovës. Nga një këndvështrim tjetër, ky veprim shihet si një “bojkot i heshtur” i Qeverisë nga një partner strategjik, duke dërguar sinjal se institucionet evropiane janë të shqetësuara për respektimin e rregullave kushtetuese dhe llogaridhënien demokratike. Por për qytetarët kosovarë, të cilët paguajnë taksa për funksionimin e shtetit, pezullimi i takimeve mund të perceptohet si një ndëshkim indirekt ndaj popullit.
Ndërsa BE-ja thekson se mbetet e përkushtuar ndaj Kosovës dhe do të vazhdojë bashkëpunimin në fusha kyçe, vendimi për të pezulluar takimet brenda Qeverisë është një tregues i qartë se institucionet ndërkombëtare po monitorojnë situatën politike dhe juridike në vend. Ky veprim ka një dimension të dyfishtë: respekt për ligjin dhe një presion i mundshëm politik ndaj Qeverisë në detyrë, që mund të ndikojë në stabilitetin dhe llogaridhënien e institucioneve kosovare.
KAQPATA
