Dy pjesëtarë të Gardës Kombëtare të Tennessee-s kanë qëlluar për vdekje një 20-vjeçar në Memphis, pasi sipas autoriteteve ai u kthye drejt tyre me armë gjatë një ndjekjeje në këmbë.
Ngjarja ndodhi të dielën në orët e para të mëngjesit, rreth orës 04:00, në qendër të qytetit Memphis, ku pjesëtarët e Gardës Kombëtare ishin duke kryer patrullime si pjesë e një operacioni federal për luftimin e krimit.
Sipas Departamentit të Policisë së Memphis, ushtarët dhe policia lokale po reagonin ndaj raportimeve për të shtëna me armë zjarri, kur nisën ndjekjen e një personi të armatosur që po largohej në këmbë.
Autoritetet thanë se pjesëtarët e Gardës hapën zjarr pasi personi u kthye në drejtim të tyre duke mbajtur armë.
Byroja e Hetimeve të Tennessee-s (TBI) identifikoi viktimën si Tyrin Johnson, 20 vjeç, dhe ka nisur hetimet për rrethanat e plota të incidentit.
Asnjë pjesëtar i forcave të rendit nuk u lëndua gjatë përleshjes. Sipas Gardës Kombëtare, dy specialistë mjekësorë tentuan t’i japin ndihmën e parë Johnsonit, por ai vdiq në vendin e ngjarjes.
Familjarët e viktimës kanë kërkuar që të shqyrtohen të gjitha provat, përfshirë pamjet eventuale nga kamerat, para se të nxirren përfundime.
Gjyshi i tij, Evaniel Johnson, tha se nipi i tij kishte ndjekur kurse në Universitetin Shtetëror të Tennessee-s, ishte baba i një fëmije të vogël dhe po përgatitej të ndihmonte në biznesin familjar të ndërtimit.
“Unë besoja tek ai dhe e di se kishte ende shumë jetë përpara. Dhimbja është që ai nuk do të ketë më mundësi ta shijojë atë që po ndërtonim së bashku”, deklaroi ai.
Kryetari i Memphis, Paul Young, e cilësoi rastin si një “incident të pafat” dhe tha se do të presë përfundimet e hetimit zyrtar para se të japë deklarata të tjera.
Garda Kombëtare është pjesë e një task-force federale të krijuar për sigurinë në Memphis nga administrata e presidentit amerikan Donald Trump. Forcat federale janë vendosur në qytet që nga tetori, pavarësisht kundërshtimeve nga zyrtarët lokalë demokratë.
Sipas Shërbimit të Marshallëve amerikanë, operacioni ka rezultuar në më shumë se 10 mijë arrestime. Ndërkohë, Byroja e Hetimeve të Tennessee-s ka lidhur disa incidente me të shtëna nga forcat e rendit me aktivitetet e kësaj task-force.
Memphis, një qytet me mbi 600 mijë banorë, prej vitesh përballet me nivele të larta të krimit të dhunshëm, përfshirë sulme, grabitje automjetesh dhe vrasje.
KAQPATA
