Qendra Klinike Universitare e Kosovës (QKUK) është duke funksionuar pa sigurim fizik, pasi rreth 260 punëtorë sigurie janë tërhequr nga puna për shkak të mungesës së kontratës ligjore.
Lajmin e ka konfirmuar kryetari i Sindikatës së Sektorit Privat, Jusuf Azemi, i cili tha se vendimi për largimin e punëtorëve është marrë nga sindikata, për të mbrojtur të drejtat e tyre ligjore dhe financiare.
“Vendimi i sindikatës ka qenë që këta punëtorë të lëshojnë vendet e punës, sepse nuk ka kontratë dhe nuk mund të vazhdohet puna në këtë formë,” deklaroi Azemi për Klan Kosova.
Ai shtoi se shpesh ka pasur raste kur punëtorët kanë punuar për javë të tëra pa u paguar, gjë që ka detyruar sindikatën të ndërmarrë këtë veprim drastik.
“Të gjithë janë larguar derisa të ketë kontratë të re, qoftë nga operatori i vjetër apo i ri. Për ne ka rëndësi vetëm siguria ligjore dhe pagesa e drejtë,” tha Azemi.
Mungesa e sigurimit fizik në objektin më të madh shëndetësor në vend ngre shqetësime për sigurinë e pacientëve, personelit mjekësor dhe pronës publike. Autoritetet përkatëse ende nuk kanë reaguar zyrtarisht për situatën.
KAQPATA
