Konflikti në Lindjen e Mesme ka hyrë në ditën e gjashtë të bombardimeve izraelite mbi Iranin, ndërsa tensionet po rriten me shpejtësi. Në Washington, administrata e presidentit amerikan Donald Trump është duke shqyrtuar mundësinë për t’u përfshirë në konflikt dhe për t’u bashkuar me ofensivën e Izraelit kundër Teheranit.
Sipas një përmbledhjeje të BBC, këto janë zhvillimet kryesore të natës së fundit:
- Presidenti Trump zhvilloi një takim 90-minutësh me ekipin e tij të sigurisë kombëtare për të diskutuar përfshirjen e mundshme të SHBA-së në luftë.
- Si objektiv i mundshëm për SHBA-në përmendet kompleksi bërthamor iranian Fordo, i cili ndodhet në thellësi të tokës dhe që vetëm SHBA zotëron teknologjinë për ta goditur me efektivitet.
- Brenda tri ditëve të fundit, të paktën 30 avionë cisternë amerikanë janë dërguar në Europë për përgatitje logjistike.
- Këshilltarët e Trump mbeten të ndarë rreth këtij vendimi, teksa analistët paralajmërojnë se ky hap mund ta “ndryshojë rrënjësisht” dinamikën e konfliktit.
- Irani nuk ka ndalur sulmet e tij kundër Izraelit. Gjatë natës, forcat iraniane lëshuan një raketë hipersonike Fattah-1 drejt Tel Avivit.
Zhvillimet po përshpejtohen ndërkohë që bashkësia ndërkombëtare shpreh shqetësime për një përshkallëzim të mundshëm në një luftë të gjerë rajonale.
KAQPATA
