Pjesëmarrja e mërgatës në zgjedhjet parlamentare të Kosovës ka rezultuar shumë e lartë. Sipas të dhënave të Komisionit Qendror të Zgjedhjeve (KQZ), mbi 80 për qind e votuesve të regjistruar në përfaqësitë diplomatike dhe konsullore kanë shfrytëzuar të drejtën e votës.
Komisioni Qendror i Zgjedhjeve ka njoftuar se në procesin e votimit jashtë vendit, të organizuar në ambasada dhe konsullata të Republikës së Kosovës, kanë votuar 22,414 qytetarë nga gjithsej 27,724 votues të regjistruar.
Sipas KQZ-së, kjo përfaqëson një pjesëmarrje prej 80.85 për qind, duke dëshmuar interesimin e madh të diasporës për procesin zgjedhor në vend.
Në konferencën e fundit për media lidhur me këtë proces, u bë e ditur se votimi ka përfunduar në 26 nga 30 përfaqësitë diplomatike të Kosovës, ndërsa në katër qendra votimi në Shtetet e Bashkuara të Amerikës dhe Kanada, procesi ka vazhduar deri në orët e para të mëngjesit sipas kohës së Kosovës.
KQZ ka sqaruar se fletëvotimet e hedhura në përfaqësitë diplomatike nuk do të numërohen jashtë vendit. Ato do të transportohen në Kosovë gjatë ditëve në vijim, ku do t’i nënshtrohen procesit zyrtar të numërimit.
Institucioni zgjedhor ka vlerësuar se procesi është zhvilluar pa probleme dhe pa incidente, duke falënderuar stafin diplomatik dhe anëtarët e këshillave të vendvotimeve për angazhimin e tyre gjatë ditës së votimit.
Pjesëmarrja e lartë e mërgatës konsiderohet një tregues i rëndësisë që qytetarët e Kosovës jashtë vendit i japin zhvillimeve politike dhe vendimmarrjes për të ardhmen e vendit.
KAQPATA
