Presidenti i Shteteve të Bashkuara, Donald Trump, planifikon të marrë pjesë në samitin e NATO-s që pritet të mbahet në Ankara më 7 dhe 8 korrik, ka bërë të ditur ministri i Jashtëm i Turqisë, Hakan Fidan.
Gjatë një interviste për Bloomberg TV, Fidan deklaroi se sipas informacioneve që disponon Ankaraja, presidenti amerikan synon të jetë i pranishëm në takimin e liderëve të Aleancës Veriatlantike.
“Për aq sa dimë, po, ai planifikon të marrë pjesë”, tha Fidan, duke shtuar se presidenti turk Recep Tayyip Erdogan ka zhvilluar disa biseda telefonike me Trump gjatë muajit të kaluar, ku është diskutuar edhe pjesëmarrja e tij në samit.
Ministri turk theksoi se Shtetet e Bashkuara mbeten të përkushtuara ndaj NATO-s, pavarësisht debateve politike dhe spekulimeve për një tërheqje të mundshme nga aleanca.
Sipas tij, Uashingtoni vazhdon t’u kërkojë aleatëve evropianë të rrisin investimet në mbrojtje dhe të marrin më shumë përgjegjësi për sigurinë e kontinentit.
“Evropianët e kanë marrë mesazhin dhe tashmë kanë filluar të rrisin buxhetet e mbrojtjes. Kur liderët të mblidhen, do të vlerësojmë progresin e arritur”, deklaroi Fidan.
Ai komentoi gjithashtu situatën në Lindjen e Mesme, duke shprehur mbështetjen e Turqisë për përpjekjet diplomatike mes SHBA-së dhe Iranit.
Fidan vlerësoi se të dyja palët po tregojnë gatishmëri për të ruajtur armëpushimin dhe për të garantuar rihapjen e Ngushticës së Hormuzit, por paralajmëroi se zhvillimet në Libanin jugor mund të rrezikojnë procesin e negociatave.
Tensionet në rajon janë rritur ndjeshëm muajt e fundit pas përshkallëzimit të konfliktit mes SHBA-së, Izraelit dhe Iranit, ndërsa përpjekjet diplomatike vazhdojnë për të shmangur një konflikt më të gjerë në Lindjen e Mesme.
KAQPATA
